ភ្នំពេញ: ស្ថិតនឹងវេលាទុក្ខមិនស្រាកស្រាន្តចិត្ត កាយក៏មមាញឹក នឹងពិធីបុណ្យខួបប្រាំពីរថ្ងៃសពប្រពន្ធ ចំណែកកូនប្រុសជាជនបង្កទុក្ខសម្លាប់ម្តាយក្រោយ ក៏ត្រូវនាំខ្លួនឡើងតុលាការសាលាដំបូងរាជធានីភ្នំពេញ តារាកំប្លែងជីវិតញាំញីដោយសោកនាដកម្មគ្រួសារនាយ ហុងដា បានប្រាប់ថា៖ «អតីតភរិយាចែកផ្លូវគ្នាច្រើនឆ្នាំ និងជាម្តាយបង្កើតជនបង្កហេតុឈ្មោះ អឿន សុខខេង អ្នកនាង ឃ្មឹប ប្រាប់ថា មិនមានប្រាក់មកមើលកូនជាប់ឃុំនោះទេ»។
នៅព្រឹកថ្ងៃទី ១៥ ខែឧសភា កូនប្រុសនាយ ហុង ដា ឈ្មោះអឿន សុខខេង ដែលជាប់សង្ស័យសម្លាប់ប្រពន្ធក្រោយរបស់ឪពុក ឈ្មោះ ស៊ឹម ចាន់ធី ហៅស្រីមុំ ត្រូវបាននាំខ្លួនទៅសាលាដំបូងរាជធានីភ្នំពេញ ដើម្បីធ្វើការសាកសួរ ជុំវិញករណីសម្លាប់ម្តាយក្រោយ។
ទន្ទឹមនឹងនោះ នាយ ហុងដា បានប្រាប់ភ្នំពេញ ប៉ុស្តិ៍ នៅរសៀលថ្ងៃទី ១៥ ខែឧសភានេះដែរថា៖ «ថ្ងៃនេះគឺជាថ្ងៃ បុណ្យគម្រប់ប្រាំពីរថ្ងៃសពប្រពន្ធ ធ្វើនៅក្នុងវត្តទួលសង្កែ។ ចំណែកកូនត្រូវចាប់ខ្លួននោះ ក៏ឮដំណឹងថា គេនាំខ្លួនឡើងតុលាការថ្ងៃនេះដែរ។ ខ្ញុំក៏មិនដឹងថា ត្រូវធ្វើយ៉ាងណា សុទ្ធតែជាកែវភ្នែកទាំងអស់»។
ប៉ុន្តែយ៉ាងណា នាយ ហុងដា ក៏ពោលបន្តថា៖ «មានតែទុកឲ្យច្បាប់គេចាត់ការ ហើយខ្ញុំក៏មិនកាន់ជើងកូនដែរ ពេលនេះ គាត់បានប្រព្រឹត្តខុសធ្ងន់ណាស់ ទាំងមនុស្សឃាត និងប្រើប្រាស់គ្រឿងញៀនទៀត»។
កូនប្រុសរបស់នាយ ហុងដា ឈ្មោះ អឿន សុខខេង នេះត្រូវបានគេស្គាល់ថា ជាកូនរួមតំណក់ឈាមរបស់តារាកំប្លែងរូបនេះជាមួយនឹងភរិយាដើម អ្នកនាង ឃ្មឹប ដែលជាកូនស្រីតារាកំប្លែងជើងចាស់នាយ ជី វ៉ាន់ស៊ុយ។
ជាមួយនឹងការចងចាំនោះ មជ្ឈដ្ឋានជាច្រើនក៏ពោលបែបចម្ងល់ថា៖ «មិនត្រឹមតែមិនមានឃើញវត្តមាន ម្តាយបង្កើតមកមើលកូនត្រូវចាប់ខ្លួននោះទេតែក៏គ្មានដែរព័ត៌មានពី ឃ្មឹប ទៅដល់ណា ឬធ្វើអ្វីនោះ?»។
ឆ្លើយតបនឹងចម្ងល់នេះ ដែរ នាយ ហុងដា ក៏ប្រាប់ឲ្យដឹងដែរថា៖ «អតីតភរិយាខ្ញុំ និងជាម្តាយកូនត្រូវចាប់ខ្លួននេះ គាត់ក៏បានដឹងរឿងនេះហើយដែរ ហើយគាត់ក៏បានខលមកជួបខ្ញុំដែរ។ ប៉ុន្តែគាត់មិនបានមកមើលកូននោះទេ»។
នាយ ហុងដា បន្តថា៖ «កូនប្រុសឈ្មោះ អឿន សុខខេង ដែលត្រូវឃុំខ្លួន ពីករណីសម្លាប់ម្តាយក្រោយនេះ គេនៅជាមួយខ្ញុំតាំងពីតូច ក្រោយខ្ញុំចែកផ្លូវពីម្តាយគេ ខណៈដែលគេមានបងប្អូនពីរនាក់ កូនប្អូននៅជាមួយម្តាយ»។
ជាមួយគ្នានោះ នាយ ហុងដា ក៏បញ្ជាក់ថា៖ «ម្តាយ អឿន សុខខេង អតីតភរិយាខ្ញុំមុន អ្នកនាង ឃ្មឹប គាត់ប្រាប់មកខ្ញុំតាមទូរស័ព្ទថា គាត់មិនបានមកមើលកូនទេ គាត់ប្រាប់ថា គាត់គ្មានលុយធ្វើដំណើរមកពីស្រុកនៅមង្គលបុរីនោះទេ»។
នាយ ហុងដា ឲ្យដឹងបន្ថែមទៀតថា៖ «អ្នកនាង ឃ្មឹប គាត់មានគ្រួសារទៀតហើយ ហើយសព្វថ្ងៃគាត់រកស៊ីវាយថ្មលក់ នៅស្រុកកំណើតគាត់ជាមួយក្រុមគ្រួសារគាត់។ តែមិនដឹងថាជីវភាពគាត់យ៉ាងណាទេ ដែលគាត់ប្រាប់មកថា គ្មានប្រាក់មកមើលកូននោះ»។
ជាមួយគ្នានេះក៏មានការបញ្ជាក់ពីមេឃុំភ្នំតូច លោក ជា សាង ដែលជាទីកំណើតអ្នកនាង ឃ្មឹប ផងដែរថា៖ «ខ្ញុំធ្លាប់ជួប ឃ្មឹប កាលពីមុនពេលចូលឆ្នាំម្តង ឃើញគាត់នៅក្នុងភូមិដែលជាស្រុកកំណើតគាត់ នៅភូមិបឹងត្រស់»។
លោកមេឃុំភ្នំតូច បានប្រាប់ឲ្យដឹងផងដែរថា៖ «តែរូបសម្ផស្សនាង មិនដូចនៅល្បី ក្នុងសិល្បៈទេ នាងបង់សម្ផស្សច្រើន ដែលមើលទៅសឹងតែមិនស្គាល់ថាអ្នកនាង ឃ្មឹប ហើយនាងក៏មានប្តីផងដែរនៅស្រុកកំណើតគាត់។ តែត្រង់ថា គាត់ប្រកបរបរអីនោះលោកមិនដឹងច្បាស់ទេ»៕
No comments:
Post a Comment