ភ្នំពេញ: តារាកំប្លែងក្នុងក្រុមនាយ ក្រឹម ដែលមហាជនស្គាល់ និងគាំទ្រដោយសារមុខប្លែកដាច់ពីមនុស្សធម្មតា នាយ ចយ ថ្មីៗនេះនៅក្នុងបណ្តាញសង្គម ឃើញមានរូបថតក្នុងភាពផ្អែមល្ហែមស្និទ្ធស្នាលជាមួយនារីរូបឆោមស្រស់សោភា ទាំងមុខមាត់ស្អាតមិនចាញ់តារាសិល្បៈ ដោយបង្អួតពីសារខ្លីថា ពួកគេជាគូស្នេហ៍នឹងគ្នា ធ្វើឲ្យរញ្ជួយចិត្តអ្នកគាំទ្រ ខណៈបុរសរូបសង្ហាជាច្រើន ផ្ទុះការច្រណែននឹងនាយ ចយ។
គណនីហ្វេសប៊ុករបស់នាយ ព្រែក ក៏បន្តបង្ហោះរូបថតនាយ ចយ ជាច្រើនសន្លឹកនោះ បង្ហាញមហាជនបានឃើញពីភាពសង្ហារបស់នាយ ចយ ស្និទ្ធស្នាល និងផ្អែមល្ហែមជាមួយនារីវ័យក្មេងម្នាក់ ដែលគេដឹងថាជាមិត្តស្រីនាយ ចយ។
ខណៈ នាយ ព្រែក សរសេរសារបែបបញ្ចើចបញ្ចើ នាយ ចយ ជាមិត្តរួមអាជីពសិល្បៈ និងជាប្អូនប្រុសថា៖ «ផ្អែមល្ហែមណាស់ គួរឲ្យច្រណែន បងជូនពរប្អូនៗ ទាំងពីរស្រឡាញ់គ្នាឲ្យច្រើនៗណា ប្អូនសម្លាញ់»។
រូបថត នាយ ចយ ផ្អែមល្ហែមជាមួយនារីរូបឆោមសម្ផស្សក៏ស្រស់ខ្ញង់ ដែលមហាជនគិតថា ជារូបថតនាយ ចយ កម្រមាននារីរូបស្រស់ បណ្តោយប្រាណនែបនិត្យបែបនេះ បានធ្វើឲ្យអ្នកលេងបណ្តាញសង្គម ចាប់អារម្មណ៍យ៉ាងខ្លាំង ដែលគូស្នេហ៍ស្រស់ស្អាត មិនប្រកាន់ពីមុខមាត់ ខាងក្រៅរបស់គេ។
ក្នុងបណ្តាញសង្គមមានមតិជាច្រើន លាន់មាត់ថា៖ «ឃើញទេ? ស្នេហាពិត គឺមានពិតមែន នៅលើលោកនេះ ដោយមិនគិតរូបសម្ផស្ស វណ្ណៈ និងពណ៌សម្បុរទេ»។ ពួកគេបានសម្តែងការរីករាយ និងជូនពរឲ្យ នាយ ចយ និងគូស្នេហ៍ ចេះស្រឡាញ់គ្នារហូតផងដែរ»។
ម្ចាស់ហ្វេសប៊ុក ខ្វាន់ឌី ខ្វាន់ ឌី ដែលគេស្គាល់ថា ជានារីរូបស្រស់ ក្នុងរូបភាពស្និទ្ធស្នាលផ្អែមល្ហែមនឹងនាយ ចយ បានសារភាពថា៖ «ខ្ញុំស្រឡាញ់នាយ ចយ ដោយមិនប្រកាន់អ្វីជាចំណុចខ្វះខាត របស់គាត់នោះទេ»។
ស្រីស្រស់ដែលកំពុងធ្វើឲ្យបុរសៗជាច្រើន ពោលច្រណែន បានបញ្ជាក់ថា៖ «វាជានិស្ស័យ»។
ខ្វាន់ ឌី លើកឡើងថា៖ «ខ្ញុំអាណិតនាយ ចយ ច្រើនជាងស្រឡាញ់ ទើបបណ្តាលឲ្យខ្ញុំ និងគាត់ ឈានដល់ការបង្កើតចំណងស្នេហ៍ និងមានរូបថតផ្អែមល្ហែមបែបនេះបង្អួតគេឯង។ ប៉ុន្តែរូបភាពនេះទើបតែកើតមានក្នុងពេលថ្មីៗនេះទេ»។
ទោះយ៉ាងណា នាយ ចយ មិនអាចសុំការបកស្រាយបានទេ ខណៈទាក់ទងចូលទូរស័ព្ទមិនមានអ្នកទទួល។ ប៉ុន្តែហ្វេសប៊ុកឈ្មោះ ខ្វាន់ ឌី ខ្វាន់ ឌី ថា ខ្លួនមិនទាន់គិតរឿងរៀបការ ឬភ្ជាប់ពាក្យជាមួយនាយ ចយ ទេ។
កញ្ញា បានហៅនាយ ចយ ថា ប៊េប៊ី និងហ៊ានឱប តារាកំប្លែងរូបនេះ ដោយទទួលបានពាក្យសរសើរថា៖ «អីយ៉ា! នាយ ចយ ពិតជាសំណាង ដែលមានស្រីស្អាតស្រឡាញ់យល់ចិត្ត»៕
No comments:
Post a Comment