ចែករំលែកអ្វីៗដែលមានប្រយោជន៍: លោក ខេមរៈ សិរីមន្ត ចង់ដូរទ្រនំ ខណៈកុងត្រានៅសាន់ដេ កាន់តែខើចខ្លី

ភ្នំពេញ: ក្រោយពីបានឈរជើងយ៉ាងយូរ ដោយមានដើមទុនទឹកដមសំនៀងបំពេអារម្មណ៍ប្រិយមិត្តនៅលើទ្រនំផលិតកម្មសាន់ដេ ប្រមាណជាង ១០ ឆ្នាំ ហើយកុងត្រាក៏កាន់តែខើចខ្លីទៀត ក៏ស្រាប់តែលេចពាក្យចចាមអារ៉ាមលេចឮល្ហៀងៗថា តារាចម្រៀងកំពូលលោក ខេមរៈសិរីមន្ត ចង់ដូរទ្រនំថ្មីក្រោយចប់កិច្ចសន្យា ខណៈគេនៅមិនទាន់ដឹងច្បាស់នៅឡើយថាជាផលិតកម្មមួយណានោះទេ។
នាពេលថ្មីៗនេះ ទើបតែទទួលបានការកោតសរសើរថា ជាតារាចូលរួមសកម្មភាពជួយសង្គមច្រើន និងងារតំណាងជាទូតសុច្ឆន្ទៈពីកម្មវិធីប្រយុទ្ធប្រឆាំងជំងឺអេដស៍ពីអាជ្ញាធរជាតិប្រយុទ្ធប្រឆាំងមេរោគអេដស៍ និងជំងឺអេដស៍ ជាមួយនឹងតារាចម្រៀងស្រី ជ្រកក្រោមទ្រនំហង្សមាស កញ្ញា ទេព បូព្រឹក និងជិតឈានជើងឡើងយន្តហោះទៅកាន់ដែនកោះប្រទេសអូស្ត្រាលី ដើមខែមិថុនា ខាងមុខនេះ រយៈពេលមួយខែ ដើម្បីទៅចូលរួមកម្មវិធីប្រគំតន្ត្រីរៃអង្គាសប្រាក់ជួយកុមារក្រីក្រកម្ពុជាតាមរយៈអង្គការ SCCFA។
បើតាមការលើកឡើងចេញពីប្រភពអ្នកស្គាល់ស្និទ្ធស្នាលនឹងក្រុមតារាចម្រៀងត្រកូលខេមរៈ បន្លឺថា លោក ខេមរៈ សិរីមន្ត ជិតចប់កុងត្រា ជាមួយផលិតកម្មសាន់ដេ ហើយឮថាមានដំណឹងចង់ចេញទៅបើកផលិតកម្មថ្មីផ្ទាល់ខ្លួនជាមួយនឹងបងប្អូនខ្លួនដែលមានលោក ខេមរៈ ភិរុណ និងកញ្ញា ខេមរៈ ស្រីពៅ ដែលទើបតែវិលពីព្យាបាលជំងឺនៅថៃ ក្រោយបាត់មុខពីសង្គមសិល្បៈមួយរយៈនោះ។
តែបើតាមលោក ខេមរៈ ភិរុណ ជាអ្នកនិពន្ធទំនុកច្រៀង និងអ្នកនាំពាក្យឲ្យក្រុមតារាចម្រៀងត្រកូល ខេមរៈ ទាំងពីរប្រចាំផលិតកម្មសាន់ដេ លោកបានផ្ដល់ចម្លើយបែបស្រពេចស្រពិល ដោយមិនទទួលស្គាល់ការចាកចេញ ហើយក៏មិនបញ្ជាក់ពីជំហរបន្តឈរជើងលើទ្រនំចាស់នេះដែរ។
បងប្រុសរបស់តារាចម្រៀងល្បីរូបនេះបានឆ្លើយតបយ៉ាងខ្លីហាក់ដូចជាមានបង្កប់នូវចេតនាមិនចង់ប្រាប់ព័ត៌មានលម្អិតថា៖ «សុំទោសផង ចំពោះរឿងហ្នឹង ខ្ញុំដូចជាមិនសូវបានដឹងច្បាស់នោះទេ។ ហើយប្រសិនបើចង់ដឹងច្បាស់ថា រឿងនោះវាយ៉ាងណា សុំចាំតាមដានហេតុការណ៍នោះឲ្យបានកើតឡើងសិនចុះ»។
តែសម្រាប់ស្ថានភាពកញ្ញា ខេមរៈ ស្រីពៅ ដែលជាប្អូនបង្កើតរបស់តារាចម្រៀងប្រុសល្បី លោក ខេមរៈ សិរីមន្ត មហាជនក៏មិនទាន់ដឹងពីពេលវេលាច្បាស់នៅឡើយទេថា តើនាងនឹងត្រូវវិលចូលមកបម្រើវិស័យការងារសិល្បៈវិញនៅពេលណា ឬក៏លែងចាប់អាជីពនេះហើយយ៉ាងណានោះដែរ ក្រោយពីបានបង្ហាញវត្តមាននៅខេត្តកំពង់ចាម ក្នុងពិធីមង្គលការបងប្អូនកាលពីថ្ងៃទី ៧ ខែឧសភា កន្លងមកនេះ?
អ្នកនិពន្ធទំនុកច្រៀងផលិតកម្មសាន់ដេ លោក ខេមរៈ ភិរុណ ក៏ធ្លាប់បង្ហើបប្រាប់ថា៖ «ចំពោះរឿងគាត់វិលចូលសិល្បៈវិញ ឬចង់ឈប់យ៉ាងណា ទោះខ្ញុំជាបងបង្កើតមែនក៏មិនបានដឹងរឿងនេះដែរ។ ព្រោះថា នេះជាជម្រើសនិងការសម្រេចរបស់គាត់ផ្ទាល់ ខ្ញុំគិតថា ទុកឲ្យគាត់សម្រេចចិត្តដោយខ្លួនគាត់ចុះ»៕